Furqat E Murshid Ki Wahshat

Furqat e Murshid Ki Wahshat Dil Se Jaa-e Khayr Se

Me Bareilly Ko Chaluñ Woh Din Phir Aa-e Khayr Se

Kaash Mere Dil Ko Murshid Ghar Banaa-e Khayr Se

Mere Dil Me Roo e Akhtar Jagmagaa-e Khayr Se

Qalb e Aasi Se Na Jaa-e Yaad e Akhtar Ki Mahak

Har Ghari Har Waqt Murshid Yaad Aa-e Khayr Se

Chashme Purnam Se Na Jaa-e Ishq e Akhtar Ki Namee

Chashme Akhtar Ki Zia Un Me Samaa-e Khayr Se

Qabr Me, Meri Madad Ko, Jub Wo Aa-e Khayr Se

Uske Jalwo Se Lahad Bhi Jagmagaa-e Khayr Se

Hijr Ke Sadme Mareez e Ishq Ab Kab Tak Saheñ

Khwaab Me Aa Kar Zara Jalwa Dikhaa-e Khayr  Se

Dar Badar Kyun Thokaren Khaa-e Bhala Shaida Tere

Mast Rehte Haiñ Yeh Teri Ik Sada-e Khayr Se

Zinda Baad Ay Mere Murshid, Mere Hazrat Zinda Baad

Dil Mera Har Dum Yahee, Nara Lagaa-e Khayr Se

Ghaus o Khwaja Awr Raza Ke Sadqe Me He lltija

Yaad e Murshid Me Mujhe Yuñ Maut Aa-e Khayr Se

Mufti e Azam Ke Faizaan e Tajal'li Aap Haiñ

Aap Ke Jalwoñ Se Laakhon Jagmagaa-e Khayr Se

Tere Jalwe Bas Gaye Haiñ Roo e Asjad Me Shaha

Tere Hee Jalwo Me Asjad Jagmagaa-e Khayr Se

He Taman'na e Dili Bahre Zia ul Mustafa

Marqad e Murshid Pe Ye Bhi Aa-e Jaa-e Khayr Se

Jal Maray Dushman Tere, Ho Jaa-eñ Khush Ahle Wafa

Aftaab e Qaadiri Jub Gungunaa-e Khayr Se

Sag e Mufti e Azam

Muhammad Afthab Cassim Qaadiri Razvi Noori

IMAM MUSTAFA RAZA

RESEARCH CENTRE

MASLAKE AALA HAZRAT

ZINDA BAAD